اسلام آباد۔18مئی (اے پی پی) پاکستان امریکی محکمہ خارجہ دی بین الاقوامی مذہبی آزادی دی رپورٹ اچ پاکستان بارے بے بنیاد دعویاں کوں ݙو توک الفاظ مسترد کریندیں ہوئیں آکھیا جو خودمختار ریاستاں دے اندرونی معاملات بارے ایجھی غلط رپورٹنگ بے معنی اتے غیر ذامہ دارانہ اے جئیں نال کوئی نتیجہ نی نکلدا۔ دفتر خارجہ دی ترجمان ممتاز زہرہ بلوچ خمیس کوں پریس بریفنگ اچ آکھیا جو اساکوں اپݨے مذہبی تنوع اتے سماجی اقدار تے فخر اے۔ پاکستان دا آئین، سارے پاکستانیاں دے حقوق اتے آزادایاں دے تحفظ اتے انہاں دے عقیدے توں ہٹ تے انہاں کوں اڳوں ودھاوݨ کیتے وݙے پیمانے تے قانونی، پالیسی اتے مثبت اقدامات کیتے ہک مضبوط فریم ورک متعین کریندے۔ انہاں آکھیاجو اے حقوق اتے آئینی ضمانتاں ہک آزادعدلیہ دے ذریعے محفوظ اتے برقرار ہن۔ انہاں آکھیاجو اساں بشمول امریکہ اپݨی ڳالھ مہاڑ اچ مسلم مخالف نفرت، نسل پرستی اتے اسلامو فوبیا اچ مسلسل ودھارے بارے سنگین خدشات دا اظہار کیتے۔
