فیصل آباد۔1جنوری(اے پی پی) وفاقی وزیر مملکت برائے اطلاعات و نشریات فرخ حبیب آکھیے جو سابق وزیراعظم نوازشریف چوراں دے چیپمئن ہین جئیں کرپشن اتے چوری دا ورلڈ کپ جیتیا ہوئے، ولیے تاں اڈیالہ جیل دی وین ایئر پورٹ تے انہاں کوں وٹھݨ کیتے پہلے کھڑی ہوسی، نوازشریف نال کوئی ڈیل تھیندی پئی اے نہ انہاں کوں کوئی این آر او ملسی۔ فیصل آباد اچ میڈیا نال الیندے انہاں آکھیا جو پاکستان مسلم لیگ ن دے قائد اتے سابق وزیراعظم نوازشریف ملک دی مݙی لٹ تے لندن اچ جائیداداں اتے محل ٻݨائی ٻیٹھن۔ انہاں آکھیا جو شہبازشریف ٹی ٹی استاد ہین، انہاں کوں پتا ہووݨا چاہیدے جو پہلی واری ملک اچ شفافیت دی بنیاد رکھی ویندی پئی اے، اے اوں عمران خان تے انگل چیندن جیڑھا بیرون ملک اپݨے فلیٹ ویچ تے پیسہ پاکستان ڳھن آئے اتے آن وسیے۔ وزیر مملکت آکھیا جو کھاوݨ پیوݨ دیاں شئیں سستیاں تھینداں پین، پٹرولیم مصنوعات دا ملھ عالمی قیمتآں نال ڄریا اے، آپ ملک رڄ لٹݨ آلے ساکوں آہدن جو معیشت ݙھلی اے؟ وزیراعظم عمران خان دی معیشت دوست پالیسی اے، اساں ایف بی آر اچ 29 سو ارب روپے ٹیکس جمع کیتے۔ وزیر مملکت آکھیا جو لیگی صدر فوٹوشوٹ وزیراعلیٰ ہن ڄݙاں جو وزیراعلیٰ عثمان بزدار الیندے ڳھٹ ہین تے کم ودھ کریندن، پچھلےسال وزیراعلیٰ عثمان بزدار 98 فیصد ترقیاتی بجٹ خرچ کیتے، ساݙھے 7 سو ارب روپیہ پنجاب دے ترقیاتی منصوبیاں تے لڳدا پئے، تاریخ دا سب توں وݙا ترقیاتی پروگرام موجودہ پنجاب حکومت چلیندی پئی اے، صحت کارڈ نال ملک دا ہیلتھ کیئر سسٹم اپ گریڈ تھی ویسی۔ انہاں آکھیا جو پاکستان پیپلز پارٹی دے چیئر مین بلاول بھٹو شہید بی بی اتے بھٹو دے مشن توں ہٹ چکین، میݙی صلاح اے جو پی پی قیادت سندھ دے عوام تے ظلم بند کرن، لوکاں کوں ریلیف ݙیون اتے جعلی اکاؤنٹس کھول تے منی لانڈرنگ دے کھیݙ نہ کھیݙن۔
