اسلام آباد۔7فروری(اے پی پی) پاکستان اچ عام انتخابات کیتے پولنگ(اڄ) 8 فروری خمیس کوں تھیسی جیندے اچ 12 کروڑ 79 لکھ 21 ہزار 49 رجسٹرڈ ووٹرز اپݨے نمائندے چݨسن۔ انتخابات اچ 17 ہزار 758 امیدوار قومی و صوبائی اسمبلیاں دے 855 حلقیاں اچ قسمت ازمیندے پن۔ قومی اسمبلی دے ہک اتے صوبائی اسمبلیاں دے 3 حلقیاں سودھا چار انتخابی حلقیاں اچ امیدواراں دے فوت تھیوݨ پاروں پولنگ ملتوی کیتی ڳئی اے۔ ملک اچ 14 لکھ 90 ہزار انتخابی عملہ ذمہ داریاں نٻھیسی اتے ایں سانڳے 90 ہزار 675 پولنگ سٹیشنز اتے 2 لکھ 66 ہزار 398 پولنگ بوتھ ٻݨائے ڳن۔ ہر حلقے دا غیر حتمی غیر سرکاری نتیجہ ریٹرننگ آفیسر دے دفتر توں جاری تھیسی۔ 8 فروری کوں پولنگ سویلے 8 وڄے بغیر کہیں وقفے دے شام 5 وڄے تئیں جاری رہسی۔ اسلام آباد توں قومی اسمبلی دیاں 3 نشستاں تے 10 لکھ 83 ہزار 29 ووٹرز اپݨے نمائندے چݨسن۔ پنجاب اچ قومی اسمبلی دی 141 اتے پنجاب اسمبلی دی 296 نشستاں تے انتخاب کیتے 7 کروڑ 32 لکھ 7 ہزار 896 ووٹرز اپݨا حق رائے دہی استعمال کریسن۔ قومی اسمبلی دی 265نشستاں تے 5 ہزار 113 امیدوار میدان اچ ہین جیندے اچوں 312 تریمتیں وی ہین۔ چارے صوبائی اسمبلیاں اچ مدمقابل امیدواردں دی کل تعداد 12 ہزار 645 اے جیندے اچ 570 تریمتیں شامل ہین۔ پورے ملک اچ 16 ہزار 766 پولنگ سٹیشن ٻہوں حساس، 29 ہزار 985 حساس ڄݙاں جو 44 ہزار 26 پولنگ سٹیشنز نارمل قرار ݙتے ڳن۔ پنجاب اچ 5 ہزار 624 پولنگ سٹیشنز حساس ترین ڄݙاں جو انہاں تے ہر پولنگ سٹیشن تے 5 اہلکار لائے ویسن۔ 8 فروری خمیس آلے ݙینھ اتخابات سانڳے چھٹی دا اعلان کیتا ڳئے۔ الیکشن دی سیکورٹی کیتے پہلے درجے تے پولیس، ݙوڄھے اچ سول آرمڈ فورسز اتے تریڄھے درجے اچ افواج پاکستان ذمہ داری ݙیسن۔ الیکشن کمیشن ایں واری عام انتخابات کیتے 26 کروڑ بیلٹ پیپرز چھاپین۔ عام انتخابات دے نتائج دی ترسیل و تدوین کیتے الیکشن مینجمنٹ سسٹم (ای ایم ایس) استعمال کیتا ویسی۔ مجاز مبصرین اتے میڈیا کوں پولنگ سٹیشن اچ داخلہ دی اجازت ہوسی۔
.jpg)