اسلام آباد۔27جنوری(اے پی پی)وزیرخارجہ مخدوم شاہ محمود قریشی آکھیے جو پاکستان امن دی بحالی، تنازعات توں ٻچݨ ،پائیدار ترقی دے اہداف پورے کرݨ کیتے کثیرالقومی تعاون کیتے پرعزم اے ۔ اے ڳالھ انہاں اقوام متحدہ دے سیکریٹری جنرل دے قیام امن فنڈ کیتے اعلی سطح کانفرنس نال خطاب اچ آکھی۔وزیر خارجہ سیکریٹری جنرل دے قیام امن فنڈ اچ پنڄوی ہزار ڈالر عطیہ دا اعلان کریندے آکھیا جو اے عہد اقوام متحدہ دی دنیا اچ قیام امن کیتے کاوشاں ساݙی سیاسی، افرادی اتے مالی مدد جاری رکھݨ دے عزم دا اظہار اے ۔وزیر خارجہ اقوام متحدہ دے سیکریٹری جنرل دے قیام امن فنڈ دی حکمت عملی 2020-2024 دا خیرمقدم کیتے، جیندے اچ تنازعات توں ٻچݨ دے پہلو تے توجہ کیتی ڳئی اے ۔ وزیر خارجہ آکھیا جو قیام امن دے بنیادی اصول ’نیشنل اونرشپ‘ کوں برقرار رہݨا چاہیدے اتے ایں اصول موڄٻ قیام امن فنڈ دی سرمایہ کاری دے سارے فیصلیاں دا تعین تھیوݨا چاہیدے ۔
