لاہور۔ 24 جولائی (اے پی پی) وزیر اعظم محمد شہباز شریف آکھیا جو برآمدات اچ ودھارے کیتے سارے وسائل لیندے پیوں، جدید ٹیکنالوجی استعمال کرݨٰی پوسی، سولر تے پن بجلی منصوبیاں نال انڈسٹری ترقی کریسی۔ صنعتی زون اچ ریئل اسٹیٹ کوں موکل کائنا ہوسی، پچھلی نالائق حکومت ملک دی معیشت دا ٻیڑہ ٻلہا ݙتے، ولا حکومت ملی تاں ملک کوں معاشی حب ٻݨیسوں۔ اے ڳالھیں انہاں سنوار کوں گورنر ہائوس لاہور اچ لاہور اتے شیخوپورہ اچ 3 صنعتی زونز دا منڈھ بدھݨ دی تقریب توں خطاب کریندیں ہوئیں آکھی۔ ایں موقع تے گورنر پنجاب بلیغ الرحمن’صوبائی وزیر رانا مشہود ‘چائنہ سودھے غیر ملکی سرمایہ کاری وی موجود ہن۔ وزیر ا عظم محمد شہباز شریف اومبراسپیشل اکنامک زون’سندر گرین زون’اسمارٹ اسپیشل اکنامک زون دا منڈھ بدھݨ دی تقریب توں خطاب کریندیں ہوئیں آکھیا جو اڄ میں صنعتی زونز دا منڈھ بدھݨ تے سارے شریک تھیوݨ آلیاں کوں مبارخ ݙینداں خصوصی طور پرائیویٹ سیکٹرز کوں جنہاں ملک اچ انہاں اکنامک زونز ٻݨاوݨ کیتے ارباں روپے دی سرمایہ کاری دا راہ سوکھا کیتے۔ محمد شہباز شریف آکھیا جو وزیر اعلی پنجاب محسن نقوی ‘پنجاب بورڈ آف انویسٹمنٹ اینڈ ٹریڈ دے سیکرٹری اتے چیف سیکرٹری کوں شاباش ݙینداں جنہاں انہاں منصوبیاں دی تیاری کیتے ݙینھ رات محنت کیتی۔ وفاقی اتے صوبائی حکومتاں انہاں اکنامک زونز کیتے ساری سہولتاں ݙیسی۔ صنعتی زون اچ رئیل اسٹیٹ کوں موکل کائنا ݙتی ویسی۔
