اسلام آباد۔1جولائی (اے پی پی) وزیر اعظم محمد شہبازشریف آکھیے جو سابق حکومت ایل این جی دے لمبی مدت معاہدے کرݨ اچ مجرمانہ غفلت کیتی اے جیں پاروں بجلی تے گیس دی لوڈشیڈنگ دا سامݨا اے،انشااللہ قوم کوں وختی اوکھی صورت حال توں کڈھیسوں ،سابق حکومت سستی گیس مل گھنݨ دا موقع ڄاݨ ٻڄھ تے ونڄایا ،لوڈشیڈنگ تےقابو پاوݨ ساݙی ذمے واری اے ،قطر نال کیتے ڳئے شفاف معاہدے کوں سابق حکومت تنقید دا نشانہ بݨایا،سابق حکومت بجلی دے پلانٹس دی مرمت نی کروائی۔جمعہ کوں پورے ملک اچ لوڈشیڈنگ دے حوالے نال منعقدہ اجلاس اچ ڳالھ کریندے ہوئیں وزیراعظم آکھیے لوڈشیڈنگ کنٹرول کرݨ دے حوالے نال ساݙیاں کوششاں دے حالی تئیں کوئی چنڳے نتیجے سامݨے نی آندے پئے، گزریل حکومت بجلی دے پلانٹس دی مرمت نی کروائی ،بند پئے پلانٹس کوں ساݙی حکومت ٻہوں اوکھیں مرمت کرتے چلایا ۔ انہاں آکھیے ایں ویلھے ایندھن دا وݙا چیلنج اے، تیل و گیس دیاں قیمتاں عالمی منڈیاں اچ گزریل کئی ݙھاکیں دی اتلی سطح تے ہن ، اساکوں اے سوچݨا پوندے جو اتنے مہانگے تیل تے گیس تے بجلی بݨاؤں تاں ایں تے کتنا زرمبادلہ خرچ تھیسی ، اساں ھک ھک پائی بچاوݨ کیتے اقدامات کریندے پیوں ، اساں خام مال تے مشینری دی درآمد تے پابندی لاتی تاں جو ڈھائی توں ترائے ارب ڈالر سالانہ دی بچت تھیوے ، عالمی منڈی اچ تیل تے گیس دیاں قیمتاں اتلی سطح تے تھیوݨ دی وجہ توں اساں ایل این جی کیتے جیڑھے ٹینڈر ݙتے ایندے وچ کجھ ٹینڈرز اچ کوئی بڈ ہی نی آئی ، جیڑھی بڈ آئی ایندے اچ 40 ڈالر فی یونٹ گیس مہانگی ملدی پئی اے ، ایں بحران توں پاکستان کوں کڈھیسوں ۔
