نیویارک۔23ستمبر (اے پی پی) وزیراعظم محمد شہباز شریف دنیا دے امیر ملکاں توں اپیل کیتی اے جو چھل پاروں انفراسٹرکچر اتے فصلاں تباہ، لکھاں لوک بے گھر تھی ڳئن، امیر ملک پاکستان کوں قرضیاں اچ ریلیف ݙیون۔ پاکستان آپݨے وسائل نال ایں صورتحال دا مقابلہ نی کر سڳدا، آندے ݙو مہینے اچ پاکستان کوں قرضیاں دی قسطاں ݙیوݨ اتے چھل اساݙی معیشت دا ضیان کر ڳئے۔ جمعے کوں ’’بلومبرگ‘‘ کوں انٹرویواچ وزیراعظم شہباز شریف آکھیا جو ایں ویلھے انہاں کوں آپݨے ملک اچ ہووݨا چاہیدا ہئی کیونجو پاکستان اچ چھل پاروں لکھاں لوک متاثر تھین، انہاں کوں ریلیف دی لوڑھ اے پر میں دنیا کوں صورتحال بارے ݙساوݨ کیتے آیاں، پاکستان کوں موسمیاتی تبدیلیاں پاروں بدترین چھل دا سامݨا اے، موسمیاتی تبدیلیاں دا باعث ٻݨݨ آلے عوامل اچ اساݙا حصہ نہ ہووݨ دے برابر اے اتے پاکستان ساریاں توں ودھ متاثر ملکاں اچوں شامل اے۔ وزیراعظم آکھیا جو چھل پارو 33 ملین لوک متاثر تھین، 400 ٻالاں سودھے 1500 لوک سیلاب دی نذر تھی ڳئن۔ لکھاں ایکڑ تے کھڑی فصلاں تباہ تھی ڳئن، 10 لکھ گھر مکمل تباہ تھی ڳئن جڈانجو جزوی طور تے متاثر تھیوݨ آلے گھراں دی تعداد وی لکھاں اچ اے۔ وزیر اعظم آکھیا جو انہاں اقوام متحدہ دے سیکرٹری جنرل سودھے عالمی رہنماواں کوں ایں صورتحال بارے ݙسیا اتے انہاں ݙسیا جو پاکستان کلھا ایں صورتحال نال نی نبڑ سڳدا، اقوام متحدہ دے سیکرٹری جنرل خود پاکستان دا دورہ کرتے صورتحال دا جائزہ ڳھدا اتے آکھیا جو ایجھی تباہی پہلے نی ݙٹھی۔ وزیراعظم آکھیا جو ترک صدر رجب طیب اردوان ،امریکی صدر جو بائیڈن اتے فرانس دے صدر ایمانویل ماکروں سودھے اعلیٰ رہنماواں ایں بارے اقوام متحدہ اچ آپݨی تقریراں اچ وی ڳالھ کیتی اے اتے زور ݙتا جو پاکستان کوں ایں ویلھے امداد دی لوڑھ اے۔ وزیراعظم آکھیا جو دنیا اساݙی جیڑھی مدد کیتی اے اوں تے اساں شکریہ ادا کریندوں پر اساکوں ودھ امداد دی لوڑھ اے۔ لکھاں ٻال بیمار تھندے پئن، کھڑے پاݨی نال وبائی امراض تھیندے پئن۔ متاثرہ علاقیاں اچ کمبل، خوراک خصوصی طور بالاں دی غذا دی لوڑھ اے۔ سیلاب پاروں تھیوݨ آلےضیان دا تخمینہ 30 ارب ڈالر لاتا ڳئے۔ ہک سوال دے ولدے اچ انہاں آکھیا جو پاکستان اتے بھارت ہمسایہ دوست ملک ہن اتے اساکوں پر امن ہمسایاں دے طور رہوݨے، امن دا قیام ہکو راہ اے جئیں نال اساں آپݨی عوام دی زندگی کوں بہتر کر سڳدوں، پاکستان اتے بھارت ڳالھ مہاڑ نال آپݨے آپسی تنازعے طے کر سڳدن۔
