اسلام آباد۔11جنوری(اے پی پی)نگران وزیراعظم انوار الحق کاکڑ آجھیے جو آئی ٹی دے شعبہ دا ملکی معاشی ترقی اچ وݙا کردار اے، خصوصی سرمایہ کاری سہولت کونسل دے تحت آئی ٹی کوں ملک دے ترجیحی شعباں اچ رلایا ڳئے، اسآں ڄڳ دے 190 ممالک کوں آئی ٹی دی خدمات ݙیندے پئے ہیں، پاکستان فری لانسنگ کیتے تریڄھا سب توں مقبول ملک ٻݨ چکیے، ملک دے چھوٹے شہراں اچ ٻئے 40 سافٹ ویئر ٹیکنالوجی پارک ٻݨائے ویسن، ملکی ترقی اچ آئی ٹی دا شعبہ کلیدی کردار ادا کریسی۔ او کنونشن سنٹر اچ ٹیک ڈسٹینیشن پاکستان دی تقریب نال خطاب کریندے پئے ہن، مصنوعی ذہانت سودھا ٹیکنالوجی دے جدید ذرائع ہݨ ہک بنیادی لوڑھ ٻݨ چکین جیندے سماجی و معاشی فوائد ملدے پن۔ وزیراعظم آکھیے جو خصوصی سرمایہ کاری سہولت کونسل اتے ایندی مختلف کمیٹیاں فعال ہین، ایس آئی ایف سی دے تحت ٻیاں ترجیحی شعباں نال انفارمیشن ٹیکنالوجی دے شعبہ دی شمولیت آئی سی ٹی انڈسٹری دی ترقی کیتے ساݙی حکومت دے عزم دی عکاس اے، حکومت ڈیجیٹل پالیسی نال اقتصادی خوشحالی اتے عوام کوں بااختیار ٻݨاوݨ کیتے پرعزم اے، پاکستان سافٹ ویئر ایکسپورٹ بورڈ سافٹ ویئر ٹیکنالوجی پارکس دی تعداد ودھائی اے۔
.jpg)
.jpg)
